پاکستان ہر حال اچ کشمیریاں دے نال کھڑے،مودی دی متکبرانہ حرکت آزادی ءکشمیر دی وجہ بنڑن آلی اے،وزیراعظم عمران خان دا اسلام آباد اچ ”کشمیر آور“مناونڑ سانگے وڈی تقریب نال خطاب

اسلام آباد ۔ 30 اگست (اے پی پی) وزیراعظم عمران خان مقبوضہ جموں کشمیر دے مظلوم بھراواں نال چھیکڑی ساہ تئیں نال کھڑن دا عزم دوہریندے ہوئے جگ کوں خبردار کیتے جیکر او اج وی بھارت دے غیر قانونی و غیر انسانی اقدام تے چپ رہے تاں ایندے گندے اثرات صرف پاکستان بھارت ہی نئیں پورے جگ تے پوسن،آر ایس ایس اتے مودی دی حکومت ہٹلر اتے نازی نظریات دے تحت بھارت توں صرف مسلماناں ہی نئیں ہر اقلیت کوں مٹاونڑ چاہندن،جے تئیں کشمیر آزاد نئیں تھیندا ہر فورم تے کشمیر دی جنگ لڑساں،پاک فوج سودھی پوری قوم کشمیریاں دی جدوجہد آزادی اچ انہاں دے نال اے،جیکر مودی آزاد کشمیراچ کوئی نواں ڈرامہ رچاونڑ دی حرکت کیتی تاں اوکوں ایندا اینجھا جواب ڈیونڑ کوں تیار ہیں جو اوندیاں نسلاں یاد رکھن۔اسلام آباد اچ ”کشمیر آور“مناونڑ سانگے وڈی تقریب نال خطاب کریندے ہوئے وزیراعظم عمران خان دا آکھنڑ ہا جو اج سارا پاکستان بھاویں اوکوئی وی ہووے،طالبعلم، دکاندار، مزدور اتے سپاہی،اساں سارے ڈت تے کشمیریاں نال کھڑے ہین،ساڈے کشمیری بھرابہوں اوکھے ویلھے توں لنگھدے پین، اسی لکھ کشمیری چار ہفتے توں کرفیو اچ ڈھکیے پین،اج اے ڈینہہ مناونڑ دا مقصد اپنڑے کشمیری بھراواں کوں اے ڈساونڑ اے جو اساں انہاں دے نال ہیں اتے انہان دے ڈکھ اچ ہکو سویں ڈکھی ہیں، جے تئیں کشمیریاں کوں آزادی نئیں ملدی،پاکستانی فوج اتے قوم انہاں دے نال کھڑی اے اتے چھیکڑی ساہ تئیں کشمیریاں دے نال کھڑے راہسوں۔ وزیراعظم، آکھیے جو اے ضروری اے جو ساکوں اے سمجھنڑاچاہیدے جو اے کینجھی حکومت اے جوکشمیریاں تے اتناظلم کریندی پئی اے،ساکوں آر ایس ایس دی سوچ سمجنڑی ہوسی،آر ایس ایس اچ مسلماناں دے خلاف نفرت دابیج بویا گئے جو ہندو سب توں چنگے ہین، ہٹلر دی نازی پارٹی توں متاثر تھی تے بنڑی اے،مقبوضہ کشمیر اچ ظلم آر ایس ایس دے نظریے دا قبضہ اے جیویں نازی پارٹی جرمنی تے قبضہ کر گھدا ہا،اے سمجھدن جو مسلماناں کوں سبق سکھاونڑا ہوسی کیوں جو اوبرابر دے شہری نئیں اتے انہاں کوں ہندوستان تے حکومت کرنڑدا سبق سکھاونڑدا ویلھا اے۔وزیراعظم عالمی برادری دی چپ تے افسوس کریندے آکھیے جڈاں وی مسلماناں تے ظلم تھیندے تاں عالمی برادری اتے اقوام متحدہ جھیں انصاف ڈیونڑ آلے ادارے چپ کر ویندن اتے انہاں دے نال تھیونڑ دی بجائے دڑوٹ ویندن۔ وزیراعظم عزم کیتا جو میڈا انشاءاللہ وعدہ اے جے تئیں کشمیر آزاد نئیں تھیندا ہر فورم تے کشمیر دی جنگ لڑساں،اج نیویارک ٹائمز اچ میڈامضمون چھپیے جیندے اچ جگ کوں ڈسائے جو کشمیر اچ کیویں ظلم تھیندا پئے اتے آر ایس ایس دا نظریہ کیویں مسلماناں ہی نئیں ہندوستان دی ہر اقلیت کیتے خطرہ اتے ہک عذاب بنڑیاہوئے،نہرو اتے گاندھی دی سیکولرازم سوچ آر ایس ایس اتے بی جے پی دی حکومت ملیا میٹ کر ڈتی اے، اے نہ کہیں عالمی قراردادکوں منیندن، بھارت دی سپریم کورٹ دی سنڑدن ، اے صرف ہندواتوا کوں منیندن۔وزیراعظم آکھیا انشاءاللہ اقوام متحدہ دی جنرل اسمبلی اچ اے معاملہ ضرور چیساں اتے پورے جگ کوں بھارت دا مکروہ چہرہ ڈکھیساں جیکر اج جگ نریندر مودی دی فاشسٹ حکومت دے اگو کھڑی نہ تھئی تاں ایندا اثر چھیکڑ تے پورے جگ تے پوسی۔وزیہراعظم خبردار کیتے جوہندوستان دی کوشش اے جو جگ دی کشمیر توں نظر ہٹاونڑ کیتے کوئی نواں ڈرامہ رچایا ونجے، ایندے بارے اساں پہلے ڈسیندے پئے ہیں جو اے آزاد کشمیر اچ کجھ سازش کرنڑ آلے ہین بھل مودی کوں چتاونڑی ڈینداں جیکر اوں کوئی بئی غلط حرکت کیتی تاں اوکوں ہر سلھ دا جواب پتھر نال ڈتا ویسی،پاک فوج دے نال پوری قوم تیار اے،جگ کوں پتہ لگنڑا چاہیدے جو جوہری ہتھیاراں آلے ملک جڈاں سامنڑے تھیسن تاں ایندے اچ صرف ساڈا ہی نئیں پورے جگ دا نقصان تھیسی۔وزیراعظم اعلان کیتے جو ہک بئی مہم شروع کریندے پئے ہیں اوندے اچ جگ دے ہر فوم کوںجگیسوں جو سجاکے تھیووکہ کشمیر اچ کتنا ظلم تھیندا پئے جوبھارت اپنڑی اپوزیشن توں وی کشمیر اچ مظالم لکیندا پئے،نریندر مودی تکبر اچ جو کجھ کر بیٹھے او چھیکڑی پتا ہا جیندے بعد کشمیر آزاد تھیونڑ آلا اے۔