نواسہ رسول حضرت امام حسینؓ دا شہادت دا ڈینھ عقیدت و احترام نال منایا گیا ہزاراں جہیں تے مجالس عزا، علم اتے شبیہ ذوالجناح دے جلوس برآمد تھئے ، سکیورٹی دے سخت انتظامات ہن

لاہور ۔ 31 اگست (اے پی پی ) نواسہ رسول حضرت امام حسین ؓ دا شہادت دا ڈینھ اتوار کوں پورے ملک اچ مذہبی عقیدت تے احترام نال منایا گیا ،شہدائے کربلا کوں خراج عقیدت پیش کرنڑ کیتے مجالس عزا دے انعقاد دے علاوہ علم اتے شبیہہ ذوالجناح دے جلوس برآمد تھئے جڈاں جو علماءتے ذاکرین واقعہ کربلا دے فضائل و مصائب تے روشنی پاتی ۔حضرت امام حسینؓ اتے انہاں دے رفقاءدی حق، انصاف اتے اسلام دا سر اچا کرنڑ کیتے عظیم قربانی تے انہاں کوں خراج عقیدت پیش کیتا گےا۔ایں سلسلے اچ صوبائی دارالحکومت سودھے صوبے دے بئے ضلعیں اچ ہزاراں جہیں تے مذہبی اجتماعات تے تقریباں منعقد کیتیاں گیاں ، لاہور سودھے کجھ جہیں تے جلوساں دی فضائی نگرانی وی کیتی گئی ،لاہور اچ 10محرم دا مرکزی جلوس نثار حویلی اندرلے موچی دروزاہ توں برآمد تھیا جداں جو بئے علم اتے شبیہہ ذوالجناح دے جلوس وی مرکزی جلوس اچ رل گئے ، مختلف علمائے کرام اتے ذاکرین مجالس عزا توں خطاب کیتا ۔ مرکزی جلوس چوک رنگ محل ، مسجد وزیر خان،چوہنٹہ مفتی باقر سوہا بازار، اندرلے ٹیکسالی گیٹ تے اندرلے بھارٹی گیٹ توں تھیندا ہویا کربلا گامے شاہ اچ ونج تے مک گیا ۔جلوس اچ شامل عزا داراں نوحہ کنی ،ماتم اتے زنجےر زنی کیتی تے غم حسینؓ اچ دھاڑاں مار تے روندے رہیے ۔ جلوس اچ تریمتاں سودھے بالاں، بڈھیں دی ودھ ساری تعداد شرکت کیتی ۔جلوس دے روٹ تے کھیر تے مٹھے پانڑیں دیاں سبیلاں لاتیاں گیاں ، جلوس دے رستے تے پولیس دی باری نفری تعینات کیتی گئی ہئی ۔ایں سلسلے اچ لاہور دی مرکزی امام بارگاہ کربلا گامے شاہ سودھے صوبائی دارالحکومت دیاں ساریاں امام بارگاہیں دی سیکورٹی بہوں سخت۔ امام بارگاہواں دے داخلی دروازیں تے واک تھرو گیٹ اتے ایندے نیڑے علاقیں دیاں چھتاں تے وی اہلکار تعینات کیتے گئے ہن ۔جلوس مکنڑ تے کربلا گامے شاہ اچ مجلس شام غریباں منعقد تھئی جیں توں مختلف نامور ذاکرین خطاب کےتا۔ سرکاری و نجی ٹی وی چینلز اتے ریڈیو مجالس شام غریباں نشر کیتی۔اخبارات اچ وی سیدالشہدا امام حسینؓ اتے شہدائے کربلا دیاں لازوال قربانیاں دے حوالے نال خصوصی ایڈیشن شائع کیتے گئے ہن ۔ پنجاب ایمر جنسی سرو س(ریسکیو1122 ) ےوم عاشور تے ماتمی جلوساں دے دوران ایمرجنسی کوردی فراہمی کیتے پنجاب دے سارے وڈے شہراں اچ رےسکےو1122 دی مخصوص ایمرجنسی ڈےوٹےاں لاتیاں گیاں ۔واسا ولوں وی ذوالجناح دے رستے تے مجلس دیاں جہیں تے نکاسی آب کیتے خصوصی انتظامات کیتے گئے ہن تے پیونڑ دا پانڑیں وافر مقدار اچ ڈیونڑ دی فراہمی وی جاری رہی ، لوڈ شیڈنگ دے ڈر پاروں ٹیوب ویلاں تے نصب جنریٹر اںتے ڈیزل اتے آپریٹرز دی حا ضری یقینی بنڑائی گی۔ ایندے توں علاوہ عاشور دے ڈینھ دے موقع تے قبرستاناں اچ وی عوام دا رش رہیا جڈاں جو شہریاں دا آپنڑیں وچھڑیے پیاریں دے ثواب کیتے فاتحہ خوانی کرنڑ دی غرض نال شہر خاموشاںاچ آمدورفت دا سلسلہ جاری رہیا۔