اسلام آباد۔2فروری (اے پی پی):پاکستان اچ کورونا دی پہلی ویکسین لاݙتی ڳئی اے ، وزیراعظم عمران خان ملک اچ کورونا ویکسی نیشن مہم دا آغاز کر ݙتے۔وزیراعظم آکھیے جو کورونا ویکسین دی صوبیں اچ مساوی تے منصفانہ ونڈ یقینی بݨائی ویسی ،معاشی سرگرمیاں دے نال تعلیمی ادارے وی کھل ڳئن ،کورونا کیساں اچ کمی آندی پئی اے ۔اے ڳالھ انہاں منگل کوں کورونا ویکسی نیشن مہم دے آغاز دے موقع تے خطاب کریندے ہوئیں آکھی اے ۔ ایں موقع تے وفاقی وزیر منصوبہ بندی و ترقی اسد عمر، وفاقی وزیر سائنس و ٹیکنالوجی فواد چوہدری، وزیراعظم دے معاون خصوصی برائے صحت ڈاکٹر فیصل سلطان اتےوزیراعظم دی معاون خصوصی برائے تخفیف غربت و سماجی تحفظ ڈاکٹر ثانیہ نشتروی موجود ہن پاکستان وی کورونا ویکسی نیشن آلے ملکاں دی فہرست اچ رل ڳئے ۔ چین توں کورونا ویکسین دی پہلی کھیپ ملݨ توں بعد وزیراعظم عمران خان ملک اچ ویکسی نیشن مہم دا آغاز کرݙتے ۔پاکستان اچ کورونا دی پہلی ویکسین پمز اسپتال دے ڈاکٹر رانا عمران سکندر کوں لاتی ڳئی اے ۔افتتاحی تقریب توں خطاب کریندے ہوئیں وزیراعظم آکھیے جو جنھاں کوں کورونا دا ودھ خطرہ اے انہاں کوں پہلے ویکسین لڳسی تے کورونا ویکسی نیشن مہم منصفانہ ہوسی۔وزیراعظم آکھیے جو ہیلتھ ورکرز دی ویکسی نیشن ساریں توں ٻہوں ضروری اے ، کورونا توں بچݨ کیتے ایس او پیز تے عمل لازمی اے ، کورونا توں بچݨ کیتے شہری ماسک دا استعمال کرن ۔ انہاں آکھیے جو پنج لکھ ویکسین ݙیوݨ تے چین دا شکریہ ادا کریندوں ، سروس سیکٹراچ کئی جاہواں کوں کورونا پاروں محدود کیتے جے شہری احتیاط کریسن تاں باقی جہیں وی کھول ݙیسوں ۔
