اسلام آباد۔11فروری (اے پی پی):وزیراعظم عمران خان آکھیے جو سرکاری ملازماں دیاں تنخواہیں اچ مناسب ودھارا کیتے، بجٹ اچ مزید ودھا ݙیسوں،مہانگ گھٹ کرݨ کیتے پورا زور لا ݙیسوں ،قیمتاں گھٹ تھیندیاں نظر آسن، سینیٹ الیکشن اچ ٻولیاں لڳ ڳئن ، سینیٹ الیکشن دی خریدوفروخت دے معاملے تے ویڈیو دی تحقیقات کیتے کمیٹی بݨا ݙتی اے ، پی ڈی ایم چوری بچاؤ موومنٹ اے ، اے ریلیف چاہندن لیکن ریلف کائناں ملسی ، تحریک لبیک دے نال معاہدے دے مطالبات کوں پارلیمان اچ پیش کیتا ویسی ، سیاستداناں ارباں روپے دیاں سرکاری زمیناں تے قبضے کیتن ،جے حکومتی پارٹی دے کہیں رکن سرکاری زمین تے قبضہ کیتے تاں شکایت کرن ، ایکشن ڳھدا ویسی ، خمیس کوں نجی ٹی وی چینل نال ڳالھ مہاڑ کریندے ہوئیں وزیراعظم عمران خان آکھیے جو سینیٹ دے الیکشن اچ گزریل 30 سال توں ووٹاں دی خرید و فروخت تھیندی آندی اے تے پیسہ پارٹی قیادت تئیں ویندے ، کہیں اینکوں روکݨ دی کوشش نی کیتی ۔ ویڈیو جے اساں ݙے ہوندی تاں جنھاں ݙو ارکان کوں اساں گزریل سینیٹ الیکشن اچ پارٹی توں کڈھیا ہئی ، انہاں دے خلاف عدالت اچ اے پیش کریندے ۔ انہاں آکھیے جو اساکوں پتہ اے جو سینیٹ دے الیکشن اچ ٻولیاں لڳ ڳئن ، بلوچستان اچ سینیٹ دی سیٹ دی قیمت 50 توں 70 کروڑ روپے چلی ڳی اے ، سینیٹ الیکشن اچ جیڑھے ایم پی اے اپݨے ضمیر ویچیسن او سینیٹرز جیڑھے پیسے ݙے تے ضمیر ملھ گھنسن او کیا پاکستان دی جمہوریت دی خدمت کریسن ۔ اے لوک ملک دے کیا فیصلے کریسن ، انھاں ہی وزیر بݨݨا ہوندے تے ملک دا مستقبل انہاں لوکاں ݙے ہوندے ۔جے ایہے لوک رشوت گھندن تاں ول تھاݨے دار تے پٹواریاں کوں کیوں الزام ݙیندے پئن جو او کرپشن کریندن ۔وزیراعظم آکھیے جو سیاستدان اکھیندن جو اساݙا استحقاق مجروح تھیندے ، ایں طرح دیاں حرکتاں نال انہاں دی کیا عزت رہ ویندی اے ۔ وزیراعظم آکھیے جو سینیٹ الیکشن اچ خریدوفروخت دے معاملے دی تحقیقات کیتے کمیٹی بݨا ݙتی اے ، اے کمیٹی ایف آئی اے اتے ٻئے اداریں دے تعاون نال تحقیقات کریسی تے ول ایندے تے مزید کاروائی کیتے الیکشن کمیشن کوں سفارشات پیش کریسی اے معاملہ نیب کوں بھجواوݨا اے یا ایندے تے کیا مزید کاروائی کرݨی اے ۔وزیراعظم آکھیے جو سپریم کورٹ اچ ویڈیو پیش کرݨ دے معاملے کوں اٹارنی جنرل ݙیکھدے پئن او سپریم کورٹ کوں حکومت دے اقدامات دے حوالے نال ݙسیسن ۔ وزیراعظم آکھیے جو 2013ءاچ خیبر پختونخوا اچ الیکشن دے بعد تحریک انصاف دی حکومت قائم تھی ہئی تے ایندے بعد 2015ءاچ سینیٹ الیکشن اچ خریدوفروخت دا عمل شروع تھی ڳیا ہئی ۔ اساݙے ایم پی ایز کوں وی رقم دی پیشکش کیتی ڳئی ہئی ، اپݨے ارکان اسمبلی کوں چتاوݨی ݙتی ہئی جے انہاں آپدے ووٹ ویچے تاں ول صوبائی اسمبلی تروڑ ݙتی ویسی ۔2018ءدے سینیٹ الیکشن اچ 18 توں 20 ارکان کوں اساں سینیٹ الیکشن اچ خریدوفروخت تے پارٹی توں کڈھ ݙتا ہئی ، اساں اچانک اوپن بیلٹ دی بات نی کیتی ، پارلیمنٹ دے ساݨے کافی عرصے توں اساݙی قانون سازی دا معاملہ زیر التواءھے۔ سیکرٹ بیلٹ دا فیدہ حکومت کوں تھیندے ، اساکوں اپݨی تعداد توں ودھ سینیٹرز ملسن یا گھٹ ، اے وی اپوزیشن ݙیکھ گھنسی لیکن ول ایہے روسن ۔ ہک سوال دے ولدے اچ وزیراعظم آکھیا جو روپے دی قدر گھٹ تھیندی اے تے ڈالر دی قیمت ودھ ویندی اے تاں گھیو ، تیل، دالاں تے ساریاں درآمدی چیزاں مہانگیاں تھی ویندن ، ایندی وجہ توں تنخواہ دار طبقے دا ساریں توں ودھ ضیان تھیندے اتے ایں ڳالھ دا علم اے جو تنخواہ دار طبقہ کوں اوکھی صورت حال دا سامݨاں اے لیکن حکومت ݙے کیا رستہ رہ ویندے اساکوں پہلے ہی مقروض ملک ملیے جیں اچ وݙا خسارہ ہئی تے وݙے قرضے ڳھدے ڳئن ۔ انہاں قرضیں تے سود ݙیندے پیوں تے اساݙا ادھا پیسہ سود ݙیوݨ تے خرچ تھی ویندے ۔ جے تنخواہیں ودھیندوں تاں خسارہ مزید ودھ ویندے جیں توں قرضہ گھنݨا ہوندے تے قرضے گھنوں تاں سود ودھ ویندے جیں دی وجہ توں مہانگ تھیندی اے ۔ انہاں آکھیے جو ملک اچ کݨک دی کٹائی ویلھے مینھ گھٹ وسݨ پاروں پیداوار گھٹ تھئی تے اساکوں کݨک درآمد کرݨی پئی ،عالمی منڈی اچ گھیو دیاں قیمتاں ودھ ڳئن ، دالاں وی مہانگیاں تھی ڳئن لیکن حکومت مہانگ دا ٻوجھ گھٹ کریسی تے قیمتاں گھٹ تھیندیاں نظر آسن ۔ انہاں آکھیے جو تھوڑا صبر کرڳھنو، ملک اوکھی صورت حال توں لنڳھدا پئے ، اﷲ دے فضل نال اساݙی برآمدات اچ ودھارا تھیندا پئے ، تنخواہیں اچ مناسب ودھارا کیتے، پہلے او من ڳئے ہن ول مطالبات ودھا ݙتے ۔ حکومتی ٹیم سرکاری ملازمین نال مذاکرات کیتے ۔ حکومت اپݨی سکت دے مطابق تنخواہیں اچ ودھارا کریندی پئی اے ، بجٹ اچ وی تنخواہیں اچ ودھارا کریسوں ۔ ہک ٻئے سوال دے ولدے اچ وزیراعظم آکھیے جو چوراں دا ٹولا اپݨِے آپ کوں پی ڈی ایم اکھیندے ، اے ڈیموکریٹک موومنٹ کائنی ، چوری بچائو موومنٹ اے۔ اے جو مرضی کرن ، اساں انہاں کوں کھلا چھوڑ ݙتے ، ساریں توں ودھ عوام تحریک انصاف دے نال نکلی اے اتے چاری واری اساں مینار پاکستان کوں بھریے ۔ میں تاں انہاں دی کرپشن دے خلاف ہی ہی سیاست اچ آیاں۔ وݙے چوراں دی چوری بچاوݨ کیتے عوام نہ نکلسی ۔
