اسلام آباد۔4فروری (اے پی پی) حکومت اتے اپوزیشن توں تعلق رکھݨ آلے ارکان پارلیمنٹ کشمیریاں دی منصفانہ اتے جائز حقوق خودارادیت دے حصول دی جدوجہد دی حمایت دے عزم دا اعادہ کریندے ہوئیں آکھیے جو کشمیریاں دی بے مثال جدوجہد آزادی کامیاب تھیسی ۔ بھارتی ظلم تے انسانی حقوق دیاں خلاف ورزیاں دنیا دے سامݨے آڳئن ۔
پارلیمانی سیکرٹری ریلویز فرخ حبیب یوم یکجہتی کشمیردے حوالےنال اے پی پی نال ڳالھ مہاڑ کریندے ہوئیں آکھیے جو بھارت 80 لکھ کشمیریاں کوں محبوس بݨا رکھیے ۔ بھارت دے انتہاپسند ہندو رہنما نریندرامودی بھارت دے قبضے وچ جموں و کشمیر دی متنازعہ حیثیت ختم کرݨ دی کوشش کیتی جیڑھی جو قابل مذمت اے ، عالمی دنیا توں اپیل کریندوں جو مسئلہ کشمیر کوں حل کرݨ متعلق اقوام متحدہ دیاں قرارداداں تے عمل کرایا ونڄے۔ کشمیریاں کوں انہاں دا ناقابل تنسیخ حق خود ارادیت ݙتا ونڄے تاں جو او آپݨے مستقبل دا فیصلہ خود کرسڳن ۔ انہاں آکھے جو کشمیر پاکستان دااٹوٹ انگ اے۔ وزیراعظم عمران خان پوری دنیا دے سامݨے مودی دا فاشسٹ چہرہ، آر ایس ایس اتے ہندوتوا دے نظریے کوں نشابر کیتے ۔ فرخ حبیب آکھیے جو کشمیریاں دی پر امن جدوجہد دی حمایت ہر فورم تے جاری رکھیسوں ۔ 5 فروری کوں کشمیری بھراواں دے نال اساں بھرپوراظہار یکجہتی کریسوں ۔
پاکستان تحریک انصاف دے رکن قومی اسمبلی احمد حسین ڈیہڑآکھیے جو اساں کشمیری بھیݨ تے بھراواں دے رلے کھڑوں ۔وزیراعظم عمران خان کشمیر دا معاملہ اقوام متحدہ اچ موثر انداز اچ چاتے ۔ کشمیری بھراواں دیاں قربانیاں قابل فخر ہن ۔
بلوچستان عوامی پارٹی دے سینیٹر انوارالحق کاکڑ یوم یکجہتی دے حوالے نال ڳالھ مہاڑ کریندے ہوئیں آکھیے جو مسئلہ کشمیر پوری امت مسلمہ دا مسئلہ اے۔ اے مسئلہ اقوام متحدہ دیاں قرارداداں دے مطابق حل کیتا ونڄے۔ پوری قوم 5 فروری کوں کشمیریاں دے نال اظہار یکجہتی کریندی پئی اے جیں دا مقصد عالمی سطح تے مسئلہ کشمیر کوں اجاگر کرݨ تے بھارتی ظلم کوں بے نقاب کرݨ اے ۔ مسلم لیگ (ن) دے سینیٹر رانا مقبول آکھیے جو مسئلہ کشمیردے حل کیتے سفارتی ذرائع استعمال کرݨ دے نال نال غیر معمولی اقدامات کرݨے ہوسن ۔ انہاں آکھیے جو کیا دنیا فلسطینیاں اتے کشمیریاں دے نال انصاف کریندی پئی اے ؟۔
پاکستان پیپلز پارٹی توں تعلق رکھݨ آلی سینیٹر سسی پلیجو آکھیے جو کشمیر اچ بھارتی ظلم ، بربریت ،شاطر چالاں تے جار حانہ سوچ دی مذمت کریندوں ، اکھنڈ بھارت داخواب نیست و نابود تھیسی۔ انہاں آکھیے جو بھارت مقبوضہ کشمیر کوں محصور کر رکھیے جیں دا ساری دنیا کوں پتہ ہے پیا ۔ پاکستان پیپلز پارٹی سودھے پوری قوم دا موقف مسئلہ کشمیر بارے ہکو سواں ھے ۔ کشمیر اچ بھارت دی شکست نوشتہ دیوار اے ۔اساکوں بھارت کوں بے نقاب کرݨ کیتے لابنگ تکھی کرݨی چاہیدی اے ۔ او ݙینھ پرے کائنی جݙاں کشمیر آزاد تھیسی ۔ اتھاں اے امر قابل ذکر اے جو کشمیر دے جھیڑے دے معاملے تے ملک دیاں ساریاں سیاسی جماعتاں سیاسی اختلافات کوں ہک پاسے رکھ تے ہکو سواں موقف رکھیندن ۔ وزیر اعظم عمران خان اقوام متحدہ سودھے عالمی فورم تے مسئلہ کشمیر موثر انداز اچ چاتے ۔ حکومت دیاں کوششاں پاروں عالمی میڈیا دی توجہ ایں مسئلہ دے پاسے آچکی اے۔ پوری دنیا بھارتی بربریت اتے ظلم دے خلاف آواز چیندی پئی اے ۔ بھارت مقبوضہ کشمیر اچ انسانی حقوق دیاں سنگین خلاف ورزیاں اچ ملوث اے۔ انٹرنیٹ اتے اظہار رائے دی آزادی اچ رکاوٹاں تے تریمتاں دی بے عزتی کیتی ویندی پئی اے ۔ پوری دنیا اچ ایں ویلھے بھارتی ظلم سامݨے آندے پئن ۔ عالمی برادری کوں کشمیر دے جھیڑے کوں حل کرݨ کیتے موثر کردار ادا کرݨ دی لوڑھ اے ۔
