اسلام آباد۔10مارچ (اے پی پی):وزیراعظم عمران خان ”کوئی بکھا نہ سمے ” موبائل لنگر دا باضابطہ افتتاح کرݙتے ۔ ابتدائی طور تے ایں پروگرام کیتے راولپنڈی، اسلام آباد کوں ماڈل شہر قرار ݙتا ڳئے جݙاں جو وزیراعظم عمران خان آکھیے جو جون توں احساس پروگرام دے تحت 3 کروڑ خانداناں کوں براہ راست سبسڈی ݙیسوں، کاشتکاراں کوں کھاداں تے براہ راست سبسڈی ݙتی ویسی ۔ بدھ کوں وزیراعظم عمران خان احساس پروگرام دے تحت ”کوئی بکھا نہ سمے ” پروگرام دا افتتاح کرݙتے۔ ایں موقع تے وزیراعظم دی معاون خصوصی تخفیف غربت ڈاکٹر ثانیہ نشتر اتے پاکستان بیت المال دے چیئرمین عون عباس پروگرام دے حوالے نال وزیراعظم کوں بریفنگ ݙتی۔ وزیراعظم اپݨے خطاب اچ آکھیے جو احساس پروگرام دی ڈاکٹر ثانیہ نشتر اتے سیکرٹری سودھے پوری ٹیم کوں میں مبارخ ݙینداں ، ایندے نال نال بیت المال دی ٹیم وی مبارکباد دی مستحق اے، انہاں پناہ گاہواں کوں ݙیکھ تے میکوں خوشی تھیندی اے جو محنت کش جیڑھے آپݨے گھر آلیں کیتے محنت کریندن او آپ دا پیسہ بچا تے انہاں کوں پٹھ سڳسن ، او مزدور جیڑھے ساریں توں اوکھی زندگی گزریندن انہاں کیتے اے پناہ گاہیں ہک پناہ اے، اتھاں انہاں کوں عزت دے نال معیاری روٹی ٹکر تے رہائش ݙتی ویندی اے ، انہاں عملے کوں ہدایت ݙتی جو او ایجھے لوکاں نال چنڳے طریقے نال پیش آون ، اینویں نہ تھیوے جو جیویں معاشرے اچ تلویں طبقے بارے سوچ اے انہاں نال اے رویہ نہ رکھیا ونڄے بلکہ انہاں کوں بہتر ماحول ݙیو ایندی مسلسل نگرانی کیتی ونڄے ، شروع اچ جݙاں اے پناہ گاہیں قائم کیتیاں تاں اتھاں تے معیار تلے ڳیا تاں ہݨ خوشی اے جو اے معیار بہتر تھی ڳئے ۔ وزیراعظم آکھیے جو بدقسمتی اے جو غریب بندے کوں ݙیکھ تے اے سوچ اختیار کیتی ویندی اے جو اینکوں غیر معیاری روٹی ݙیوݨ نال کوئی فرق نی پوندا اساں ایندا خیال کرݨا اے کئی علاقے ایجھے ہن جتھاں لوک بکھے سمدن اساں ہک فلاحی ریاست بݨاوݨ دا ٻیڑا چاتے اتے اے ایندے پاسے پہلا قدم اے۔ وزیراعظم آکھیے جیڑھے علاقیں اچ بکھ ہووے اتھاں توجہ ݙیوݨی اے ، وزیراعظم آکھیے جو اساں ایں پروگرام توں ٻہوں کجھ سکھسوں۔
